Deciseis años tinía, guapos años gayasperos, que xueguen y salten semeyando xilgueros. Son los primeros versos del cantar popular que’l grupu asturianu Nuberu convertiría nun himnu na Transición. El tema rellata la muerte de la rapaza Aida de la Fuente Penaos na Revolución del 34. En realidá tenía diecinueve años pero la imaxe ye igualmente poderosa. Una mocina dexando la comba y garrando en cuenta les armes.
Ye ochobre y el movimientu obreru asturianu entama xuníu’l que va ser el procesu revolucionariu caberu de la Europa Occidental, que se llevanta escontra la entrada de la estrema derecha (trés ministros de la CEDA) nel gobiernu de la República. La fuelga xeneral revolucionaria convócase en tol país, anque namás llogrará caltenese activa n’Asturies. Durará quince díes, del 5 al 19 d’ochobre y, pel mediu, un día 13, la moza Aida, qu’actuaba como enllaz de los revolucionarios, morrerá cerca de la ilesia de San Pedro de los Arcos d’Uviéu mientres facía por tornar con una ametralladora l’avance de la Lexón qu’intentaba afogar el llevantamientu.
Aida medrara nuna familia mui comprometida políticamente. El padre fora ún de los fundadores del Partíu Comunista n’Uviéu y tanto ella como los sos hermanos militaben nes mocedades del partíu, asina que nun ye raro que la rapaza tuviere un papel activu na revolución. Sicasí, y anque nun heba que pensar nos diecinueve años d’Aida como nos diecinueve d’anguaño, la so enorme xuventú, seguramente, y que fora una muyer, con total seguranza, fixeron que’l día qu’ella morría naciera al empar el mitu: la Rosa Roja d’Asturies.
Un símbolu poderosu pa la esquierda que diría espoxigando col tiempu y que na Transición, colos compases del nuevu canciu astur y el primer aire de la llibertá tres de cuarenta años de dictadura, volvería a asitiase con fuercia nel imaxinariu asturianu onde tovía güei se caltién viva.
o 